Halyqaralyq «EýroHım» mıneraldy-hımııalyq kompanııasynyń Jambyl oblysynda birqatar jobalardy bastap ketkeninen jurtshylyq habardar. Halyqaralyq kompanııanyń elimizdegi basshylyǵy EKSPO qalashyǵynda sońǵy alty aıdaǵy jumys nátıjesimen, sondaı-aq, elektr qýaty men sý kólemin tómendetýge múmkindik beretin jańa tehnologııamen tanystyrdy. Shara barysynda kompanııa tarapynan «Almaty-2005» balalar hokkeı komandasy marapattaldy.
«EýroHım» kompanııalar toby respýblıkalyq bıýdjetke mol kólemde salyq tólep otyrǵan iri ınvestorlardyń qatarynda. Tek bıylǵy jartyjyldyqtyń qorytyndysy boıynsha 900 mıllıon teńgeden astam qarjy aýdarylǵan. Kompanııa qazirgi kezde Jambyl oblysyndaǵy Qarataý fosforıt alabynyń ken oryndaryn ıgerýge arnalǵan ınvestısııalyq jobalardy júzege asyrýda. Indýstrııalandyrý kartasyna engen bul joba elimizdi qajetti mıneraldy tyńaıtqyshtarmen qamtamasyz etetin bolady. Bul týraly «EýroHım – Qarataý» JShS baqylaý keńesiniń múshesi Erkebulan Myrzaǵalıev málimdedi.
«EKSPO kórmesinde biregeı hımııalyq keshenniń jobasyn tanystyrý biz úshin qýanyshty jańalyq. Ony jobalaýda «EýroHım» kompanııasynyń sony tehnologııalary qoldanyldy. Osynyń arqasynda fosfat kenin daıyn ónim etip tolyǵymen qaıta óńdep, qorshaǵan ortaǵa zııanyn tıgizetin barlyq qaldyqtardyń kólemin barynsha tómendetýge múmkindik alyp otyrmyz. Sýmen qamtıtyn tuıyq júıe sýdyń aǵyp ketýiniń aldyn alyp, tutynylatyn sý kólemin azaıtsa, qaıtalama energııa qorlaryn ózimizde óndirý arqyly tutynylatyn elektr qýaty tómendeıdi» – dedi ol.
Shara sońynda Erkebulan Myrzaǵalıev «Almaty-2005» balalar hokkeı komandasyn quttyqtap, marapattady. Aıta keteıik, balalar hokkeı kompanııasy «EuroChem 2017» halyqaralyq hokkeı saıysynan jeńispen oralǵan edi. Qazaqstandyq jas hokkeıshiler fınalda reseılik komandany jeńgeni este. Al «EýroHım – Qarataý» kompanııasy balalar hokkeı quramasynyń demeýshisi ári shabyt berýshisi.
Aıgúl Seıil,
"Egemen Qazaqstan"